حين انغمرت بالماء بسبب السيارة المسرعة التي دعست على بركة ماء منذ الصباح.. علمت انه سيكون يوما ...رررااائعا!
هه
كم اكره الخريف لأنه يذكرني بحكومتنا التي تهمل امر تصريف مياه الامطار !
"كدي دقيقة هي ما بهمها امر الشعب حيهتمو بالموية المدفقة في الواطة دي؟"
ضيعت ربع ساعة عشان ارجع و البس حاجة ناشفة و ربع ساعة تانية و انا مستنية خيال مواصلات الكوبري تجي! هه يعني عشان امس جات مطرة و اتبللينا لمن حسيت انو البيوت حتدوب طين.. يقوم بتاعين المواصلات يصرفو لي روحم اجازة؟ ما نقرا ولا شنو يعني..
أه.
خلاس ياخ حاركب امجاد.. و ما ان قفزت تلك الفكرة الالمعية في ذهني حتى اختفت كل الامجادات تماما.. هسي كانو بتجارو! استغفر الله العظيم يا ربي! انا متأكدة اني لمن رجعت البيت اغير كانو عاملين تجمع هنا!
واي انا!
و اتذكر فجأة حديث صديق كان يقول دائما ان ابتسم في وجه الصباح كل يوم و ان اتوهم ان هذا اليوم سيكون افضل ايام حياتي!
*و كأنو في موسيقى شغالة في الخلفية, و الدنيا بدا يتحول لونها للبمبي..و .......
بلا كلام فارغ عليك الله!*
فابدأ بالتبسم بقوة و احتفظ بالابتسامة حتى تستقر -اخيرا- اول امجاد زرقاء و يرمقني سائقها بنظرات تفحيصية ليتبين وضعي الاقتصادي و ربما الاجتماعي!
و ادعو انا ربي في تلك اللحظات ان ينزل على قلبه الرحمة و يرحمني من الارقام ذوات الخانتين!
"ماشة جامعة الخرطوم لو سمحت"
"لالا انا ما بمشي الجامعة." و فوووو يطير كأنو ما كان! بس الحمدلله انو بلّ مقدمة جزمتي بس!
اكورك "وما بتمشي الجامعة ليه؟ بتمشي هارفرد بس؟ أي نعم هي كريهة لكن اها نسوي..."
حينها تتنبه إلي سيدة "ملطوعة برضو" و تبدأ بالضحك و اقرب انا افلقا برزمة الشيتات الفي يدي! اللهم اني صائم!
...
و الوقت يأخذ في الضجر..
و يا قول صحبتي مخي من جوا عامل "شششششششش" زي ارسالنا الأرضي.. لحدي ما يخلعني عمو الامجاد الجاية, السمين ..
"خمصطاشر؟"
"يا بتي الدنيا ما رمضان..اتي عارفة لستك الامجاد بقى بي كم؟"
*الدنيا رمضان اتا دا والله!*
"بقى بي كم؟"
"والله من تزعين وصل ميه و ستين و ميه و تمنين.. !"
*ياخ انا مالي و مال جوز الكفرات بي كم*
"عاين كدي.. شكرا. انت بعيد والله"
"اها انت عايزة تمشي بي كم؟
*لو قلت ليو بي خمسة حيبللني قاصد!*
"لالا معليش ما شكلنا حنتفق"
....
و بعد تمنية دقايق جرجرة و الخوض في السياسة و الدين والاقتصاد و تعداد المجتمعات التحت خط الفقر و اسعار السكر... اخيرا رضى يوديني بي سبعه.. بالله شوف المفترين ديل..
"جامعة الخرطوم ما شاء الله.. ناس شاطرين"
قلت بدل ما يبدا يرغي و نقعد نقطع و ننبذ في الحكومة-اصلا دا مدخلم-.. احسن شي اقول ليو :
"آآ انا عندي ملحق اسي ماشة امتحنو"
و رأيت دهشته من خلال المرآة الامامية.. و قعدت انا اضحك من جوا
"عادي يا بتي الملاحق دي ياما شلنا ملاحق ايام الجامعة"
و يسود الصمت و الحمد لله و ارقب انا اعمدة الكهرباءو المباني و السيارات المجاورة و هي تهرول على عجل..
و حينما وصلت اسوار الجامعة بدأت اتخيل في الامتحان..
و استرجع المليون كلمة الحفظتهم امس.. و يعيق افكاري دائما ما علق بجدران الجامعة الداخلية..
حركة الطلاب الاسلاميين الما بعرف شنو.. المستقلين.. الاصلااااح لــ..
آآه اختفو ياخي خلوني اعرف اراجع حاجة..
و ما ان وصلت باب القاعة.. وضعت حقيبتي على الارض.. و نظرت الى عمو نور الدايم و هو يبتسم و بكشكش في كم مفتاح..
"انتي...؟"
"آي انا..."
و يبدا يحك راسو.. مااا قعد اتطمن لمن يعمل كدا..
"والله بسبب مطرة امبارح دي الموية قفلت كم حلة كدا و منهم الحتة الساكنة فيها المسجلة و اللي هي الوحيدة المعاها مفتاح المكتب الفيهو ورق الامتحان..فاتأجل لحدي ما الله يفرجا"
.
.
.
.
.
اللهم اني صائم, اللهم اني صائم, اللهم اننني صاااائم
No comments:
Post a Comment